Üç mindən çox müəllimin maaşında artım olacaq.
Sumqayit24.az Təhsil İnstitutuna istinadən xəbər verir ki, Təhsilverənlərin təkrar sertifikatlaşdırılması prosesinin müsahibə mərhələsinin nəticələri açıqlanıb. Məlumat müəllimlərin şəxsi kabinetlərinə göndərilib.
Müəllimlər portal.edu.az platformasında yerləşən "Sertifikatlaşdırma” bölməsində müsahibə nəticələri ilə tanış ola bilərlər.
Təkrar sertifikatlaşdırmanın müsahibələrində 3393 müəllim uğur qazanaraq sertifikatlaşdırmadan keçib. Müsahibələrdə 99% davamiyyət qeydə alınıb.
Təhsil İnstitutundan qeyd edilib ki, təkrar sertifikatlaşdırmadan keçmiş 3252 təhsilverənin vəzifə maaşına 35%, 24 təhsilverənin vəzifə maaşına isə 10% artım tətbiq olunacaq.
Həmçinin bildirilib ki, təhsilverənlərin təkrar sertifikatlaşdırılması prosesinin müsahibə mərhələsinin apellyasiya müraciətləri 25 sentyabr saat 12:00-dan etibarən qəbul ediləcək.
Müəllimlər şəxsi kabinetlərinə daxil olaraq 24 saat ərzində apellyasiya müraciəti edə bilərlər.
