Bu gün Azərbaycanın Milli Qəhrəmanı, şəhid general-mayor Polad Həşimovun doğum günüdür.
Polad İsrayıl oğlu Həşimov 2 yanvar 1975-ci ildə Qəbələ rayonunun Vəndam kəndində anadan olub. Sonradan ailəsi ilə birlikdə Sumqayıta köçüb. Qəhrəmanımız 28 nömrəli, sonra isə 34 nömrəli məktəblərdə oxuyub.
1992-ci ilin dekabrında Ağdam rayonunun Mərzili və Novruzlu kəndlərinin müdafiəsinə qatılıb. 1993-cü ildə dövlət çevrilişi cəhdinin qarşısının alınmasında iştirak edib. O, Füzuli rayonunun kəndlərinin azad edilməsi ilə nəticələnən uğurlu əməliyyatlar keçirib.
Polad Həşimov Vətənimizə göstərdiyi layiqli xidmətə görə “Hərbi xidmətlərə görə”, “Vətən uğrunda” medalları, “Vətənə xidmətə görə” III dərəcəli orden, 2016-cı ildə Aprel döyüşlərindən sonra isə “Vətənə xidmətə görə” II dərəcəli ordeninə layiq görülüb. Həmçinin “Qüsursuz xidmətə görə” medalının hər üç dərəcəsi, “Hərbi xidmətdə fərqlənməyə görə” III dərəcəli medallarla təltif olunub.
Həşimov 2-4 aprel 2016-cı ildə Talış kəndi yüksəklikləri uğrunda döyüşlərdə 1-ci Ordu Korpusunun Qərargah rəisi olub. Ağır savaş zamanı yaralanıb. Həmin istiqamətdəki postlardan birinə onun adı qoyulub.
25 iyun 2019-cu ildə Polad Həşimova general-mayor ali hərbi rütbəsi verilib. Sonra o, 3-cü Ordu Korpusunun Qərargah rəisi təyin olunub.
12 iyul 2020-ci ildə Tovuz rayonu istiqamətində ermənilər artilleriya qurğularından mövqelərimizi atəşə tutublar. 14 iyul tarixində döyüşlər zamanı general-mayor Polad Həşimov, polkovnik İlqar Mirzəyev, eləcə də beş hərbi qulluqçumuz qəhrəmancasına şəhadətə ucalıblar.
Həşimovun nəşi əvvəlcə Vəndam kəndinə, sonra isə yaşadığı Sumqayıt şəhərinə gətirilib. Növbəti gün isə II Fəxri xiyabanda, polkovnik İlqar Mirzəyevlə yanaşı torpağa tapşırılıb.
General-mayora ölümündən sonra Azərbaycanın Milli Qəhrəmanı adı verilib.
Polad Həşimov Azərbaycan Silahlı Qüvvələrinin hərbi əməliyyatlar zamanı şəhid olan birinci və yeganə generalıdır.
Bakıda, Sumqayıtda və Qəbələdə küçələrə onun adı verilib. Bundan əlavə, paytaxtımızda və Türkiyənin Osmanqazi rayonunun Dəmirtaş bölgəsində “Polad Həşimov park”ları salınıb.
P.Həşimovun Davud və Teymur adında oğulları, Aybəniz adında isə qızı yadigar qalıb.
