Sumqayıt ilə Saray qəsəbəsini birləşdirən körpüdəki qazıntı işləri ilə bağlı açıqlama verilib.
Qafqazinfo xəbər verir ki, "Azəriqaz" İB-nin mətbuat katibi Eldəniz Vəliyevin sözlərinə görə, ərazidə Abşeron-Saray qaz xəttinin Sumqayıtla əlaqələndirilməsi işləri aparılır:
"Bu da payız-qış aylarında həmin ərazidə yaşayan abonentlərin daha davamlı, təhlükəsiz və fasiləsiz qazla təmin olunmasına xidmət edəcək. Bununla bağlı əməkdaşlarımız çox ciddi işlərə başlayıblar. Körpünün dağıdılması ilə bağlı şikayətlər isə əsassızdır, qətiyyən belə bir hal yoxdur. Əməkdaşlarımız körpüyə yaxınlaşıb, amma üzərinə keçməyiblər".
Qurum sözçüsü bildirib ki, sakinləri əraziyə cəlb olunan ağır texnikalar narahat edə bilər:
"Ona görə də avtomobillərin keçməsi üçün bir xətt saxlanılmışdı, bu da tıxac yaradırdı. Bunu nəzərə alaraq, sentyabrın 9-dan "Azəriqaz" İB işlərin gecə növbəsində aparılmasına qərar verdi. Beləliklə, tıxacın da qarşısı alındı. Vətəndaşlardan xahiş edirik ki, təşvişə düşməsinlər, körpüyə heç bir zərər yetirilə bilməz".
