Sumqayıt şəhərindən Gürcüstan və Rusiyaya sulfat turşusu ixrac ediləcək. Bu barədə 26 yanvar tarixində Sumqayıt24 xəbər verir.
"Azərsulfat" MMC-nin direktoru Emin Quliyev jurnalistlərə açıqlama verib. O bildirib ki, ilk partiyada Gürcüstana 250-300 ton, illik isə 7500 ton həcmində sulfat turşusu göndəriləcək. Rusiyaya isə illik ixracın həcmi 6 min ton təşkil edəcək. Artıq sənədləşmə işlərinə başlanılıb. Gürcüstanın Rustavi Azot Müəssisəsi ilə müqavilə bağlanılıb, Rusiyanın bir neçə müəssisəsi ilə də danışıqlar aparılır:
“Sənədləşmə prosesi çətindir. Xarici dövlətlərdən kvota alınmalıdır. Amma proses bitmək üzrədir".
E. Quliyevin sözlərinə görə, hazırda müəssisənin illik istehsal gücü 20 min tondur. Bunun bir yarısı daxili bazar, digər yarısı isə ixrac üçün nəzərdə tutulub:
“Əvvəllər Azərbaycana sulfat turşusu idxal edilirdi, zavod fəaliyyətə başladıqdan sonra yerli tələbat tam ödənilir. Məhsulun birinci partiyası Dövlət Neft Şirkətinin (SOCAR) Metanol zavoduna göndərilib".
Qeyd edək ki, “Azərsulfat” Sumqayıt Kimya Sənaye Parkının rezidentidir.
