Sumqayıt-Bakı marşrutu üzrə avtobuslar fəaliyyət göstərsə də, dayanacaq sayı azdır. Bu nəqliyyat vasitəsinin çoxsaylı dayanacaqlarının olmaması səbəbindən "manatlıq" avtobuslar fəaliyyət göstərir. Bu avtobuslar da Sumqayıt ərazisindən sərnişinlə dolu çıxdıqları üçün yolüstü digər ərazilərin sakinləri səhərlər işə gəlməkdə çətinlik çəkirlər.
Bəs niyə "BakuBus" dayanacaqlarda saxlamır?
Mövzu ilə bağlı Redaktor.az-ın sualına cavab verən Avtomobil Yolları Nəqliyyat Agentliyinin (AYN) mətbuat katibi Tural Orucov bildirib ki, bu avtobuslar daha az dayanacaq sayı ilə uzun məsafələrə səfər etmək üçün hesablanıb:
"Sumqayıtdan Bakı şəhəri istiqamətinə ictimai nəqliyyatın təşkili ilə bağlı sərnişin tələbatı nəzərə alınaraq, AYNA tərəfindən Sumqayıt şəhər Avtovağzalını Bakı Beynəlxalq Avtovağzal Kompleksi ilə əlaqələndirən ekspres marşrut xətti təşkil edilib.
Bu ilin yanvarın 21-dən fəaliyyətə başlayan ekspres avtobuslar Sumqayıt Avtovağzalı, “Bağça Şəhər” yaşayış kompleksi, Sumqayıt dairəsi, Ceyranbatan qəsəbəsi, metronun “Avtovağzal” stansiyası, Bakı Beynəlxalq Avtovağzal Kompleksi marşrutu üzrə hərəkət edir. Müntəzəm avtobus marşrutlardan fərqli olaraq ekspres avtobuslar daha az dayanacaq sayı ilə uzun məsafələrə səfər etmək üçün hesablanıb".
