Yeni tədris ili başlayandan marşrut avtobusları və metroda sərnişin sıxlığı müşahidə edilir. Sıxlıqdan qaçmaq istəyən şəxslər Bakı-Sumqayıt sürət qatarlarına üz tuturlar. Lakin burada da, sərnişinlər sözün əsl mənasında “ağız-ağıza” dayanmalı olurlar.
Şikayətçilərdən Sumqayıt24-ə daxil olan məlumata görə, qatarlarda əlavə boş vaqonlar olsa da, heç kim bu vaqonlara keçə bilmir, daha dəqiq desək, buraxılımır. Bu isə insanlar arasında müəyyən narazılıq və fikir ayrılığı yaradır.
Məsələ ilə bağlı “Azərbaycan Dəmir Yolları” QSC sorğumuza cavab olaraq bildirib ki, həmin vaqonların Bakı-Sumqayıt-Bakı xətti üzrə istifadəsi nəzərdə tutulmayıb.
“Bu yerlərin (vaqonların) Bakı-Sumqayıt xətti üzrə istifadə olunan yerlərlə müqayisədə nə kimi özəllikləri var?” sualımıza isə belə cavab verildi:
“1-ci klass yerlər olkədaxili reyslər üçün nəzərdə tutulub. Nəzərinizə çatdırmaq istəyirik ki, birinci sinif vaqonda oturacaqlar elektrik yuvaları və dirsəkaltı ilə təchiz olunub. Onlar, 180 dərəcə fırlana və istəyinizə uyğun tənzimlənə bilər. Sərnişinlər qulaqlıq, planşet, dabankeş, gözlük (yatmaq üçün), ədyal, tərlik, dəsmalla da təmin edilir. Bu siniflə səyahət edən sərnişinlərə qatarda səfər zamanı ödənişsiz yemək təklif olunur. Qida çeşidlərinə qəlyanaltı, səhər yeməyi, sendviç, meyvə şirəsi, çörək məmulatları daxildir.
Bundan əlavə, sərnişinlərə limitsiz su, çay və ya qəhvə verilir. Sözügedən qidaların qablaşdırılması üzərində istehsal tarixi, saxlanma şərtləri, istifadə müddətinin son tarixi qeyd edilir. Sərnişinə səfərboyu bir dəfə ödənişsiz, növbəti dəfə isə ödəniş etməklə menyudan istənilən məhsulu ala bilmə imkanı yaradılır”.
