Sumqayıtda yol qovşaqlarının birində nəqliyyatın təşkili ilə bağlı problemlər yaşanır.
Sumqayit24.az-a daxil olan məlumata görə, Cəlil Məmmədquluzadə küçəsində, "4 qardaş restoranı"nın qarşısında nəqliyyat axını bir neçə istiqamətdən formalaşır. Belə ki, həm əsas yoldan gələn avtomobillər, həm də şəhərin bulvar istiqamətindən çıxan nəqliyyat vasitələri eyni nöqtədə birləşir.
Vətəndaşların sözlərinə əsasən, Novxanı istiqamətindən gələn yolda işıqfor quraşdırılsa da, bulvar tərəfdən gələn hissədə işıqforun olmaması sürücülər arasında çaşqınlıq yaradır. Bu səbəbdən xüsusilə də günün pik saatlarında ərazidə tıxac müşahidə olunur.
Bundan əlavə, sakinlər bildirirlər ki, ərazidə piyada keçidləri də uyğun nöqtələrdə yerləşdirilməyib və bu da piyadaların hərəkətində çətinlik yaradır.
