Novxanı qəsəbəsində yaşayan Ceyhun İbrahimov satış məqsədi ilə heyvan təsərrüfatı yaradıb.
Qaynarinfo-nun məlumatına görə, fermer 11 baş eşşək saxlayır. Onlardan dördü sağılandır. Onların südünü sataraq əldə etdiyi pulla digərlərinin yemini alır. Bu məşğuliyyət sərfəli olmasa da, fermer heyvanlara sevə-sevə qulluq etdiyini deyir.
Südün stəkanı (200 qramı) 10 manatdır. Ceyhunun sözlərinə görə, əvvəl südü ehtiyacı olanlara pay versə də, sonradan heyvanların yemini təmin etmək üçün satışa başlamaq məcburiyyətində qalıb.
Həkim-terapevt, tibb üzrə elmlər doktoru Adil Qeybulla eşşək südünün antioksidant sayıldığını deyir. Onun sözlərinə görə, bu süddə xalq təbabətində ürək-damar xəstəliklərinin, vərəmin eləcə də bağırsaq florasının müalicəsində istifadə olunur.
Qeyd edək ki, tərkibinə görə ana südünə ən yaxın süd hesab olunan bu məhsuldan kosmetologiyada da geniş istifadə olunur.
