Vətən müharibəsi başa çatdıqdan sonra Qarabağdakı separatçı rejım suveren ərazilərimizdə silahlı təxribatlarını davam etdirirdi. Azərbaycan ordusunun mövqelərini müxtəlif çaplı silahlardan sistemli şəkildə atəşə tutur, ərazilərimizi minalamağa davam edir, döyüş mövqelərini mühəndis cəhətdən təkmilləşdirirdi və bu da gərginliyin artmasına səbəb oldu.
2023-cü il sentyabrın 19-da qanunsuz erməni silahlı birləşmələrinin təxribat-diversiya qrupu tərəfindən Xocavənddə yerləşdirilən minanın partlaması nəticəsində törədilən terror aktı zamanı Daxili İşlər Nazirliyinin (DİN) dörd əməkdaşı da daxil olmaqla, 6 nəfər həyatını itirib.
Azərbaycan mina partlayışını terror aktı adlandırıb və bəyan edib ki, hadisə qanunsuz erməni silahlı birləşmələrinin əraziyə mina yerləşdirməsi nəticəsində baş verib.
Həmin hadisənin ardından Azərbaycan Ordusu antiterror əməliyyatlarına başlayıb. Ordumuzun həyata keçirdiyi lokal xarakterli antiterror tədbirləri zamanı Ermənistana məxsus olan döyüş vasitələri və hərbi təyinatlı obyektlər yüksək dəqiqlikli silahların tətbiqi ilə sıradan çıxarılıb.
24 saatdan az müddətdə davam edən antiterror əməliyyatı nəticəsində Azərbaycan Qarabağdakı qanunsuz separatçı rejimin mövcudluğuna son qoydu.
Azərbaycan Silahlı Qüvvələrinin sentyabrın 19-20-də Qarabağda həyata keçirdiyi lokal antiterror tədbirləri zamanı 192 hərbçi və 1 mülki şəxs şəhid olub, 511 hərbçi yaralanıb.
Antiterror tədbirləri zamanı Sumqayıt şəhəri və Ceyranbatan qəsəbəsindən şəhid olan Azərbaycan Ordusunun hərbçilərinin adlarını təqdim edirik:
- Ramil Arif oğlu Şirinov;
- Asim Kinyaz oğlu Camalzadə;
- Zamin Xəqani oğlu Abbasov;
- Ramil Sücəddin oğlu Rəhimov;
- Cavid Azər oğlu Mirzəyev.
Allah bütün şəhidlərimizə rəhmət eləsin!
