18 sentyabr - dahi bəstəkar Üzeyir Hacıbəylinin dünyaya göz açdığı gün Azərbaycanda Milli Musiqi Günü kimi qeyd olunur.
Sumqayıt24 xəbər verir ki, ulu öndər Heydər Əliyevin müvafiq Sərəncamına əsasən, bu gün münasibətilə hər il müxtəlif bölgələrdə tədbirlər keçirilir.
Bu gün dahi bəstəkar, Azərbaycan professional musiqi sənətinin banisi, musiqişünas-alim, Şərqdə ilk operanın müəllifi kimi tanınan, ictimai xadim Üzeyir Hacıbəylinin anadan olmasının 139 illiyi tamam olur.
Bəstəkar, alim, yazıçı, publisist, ictimai və siyasi xadim Üzeyir Hacıbəyli Şərqdə ilk operanın banisi kimi tanınır. Onun əməyi sayəsində Azərbaycan milli opera sənətinin tarixi 116 il bundan öncə tamaşaya qoyulan “Leyli və Məcnun” operası ilə başlandı.
Operanın ilk dirijoru Əbdürrəhim bəy Haqverdiyev, rejissoru Hüseyn Ərəblinski olub. Məcnun rolunda ölməz sənətkar Hüseynqulu Sarabski, Leyli rolunda isə aşpaz şagirdi Əbdürrəhim Fərəcov çıxış ediblər. İlk tamaşa 1908-ci ildə Bakıda Hacı Zeynalabdin Tağıyevin teatrında oynanılıb.
Qeyd edək ki, Üzeyir Hacıbəyli bir çox operaların müəllifidir. Onun yaradıcılığının zirvəsi isə “Koroğlu” operasıdır. Şərqdə ilk operetta janrının yaranması da Üzeyir Hacıbəylinin adı ilə bağlıdır. Dahi bəstəkarın ilk musiqili komediyası üç pərdədən ibarət “Ər və arvad”dır. Bu əsər Azərbaycanda musiqili komediyanın ilk nümunəsidir. Əsərin ilk tamaşası 1910-cu ildə olub. Rollarda H.Sarabski (Mərcan bəy), Ə.Ağdamski (Minnət xanım) və başqaları çıxış ediblər.
Müəllifin ikinci musiqili komediyası “O olmasın, bu olsun”dur. Əsərin ilk tamaşası 1911-ci ilin aprelində Bakıda olub. Ölməz sənətkarın üçüncü və sonuncu musiqili komediyası isə “Arşın mal alan”dır. Bu operetta 70-ə yaxın xarici dilə tərcümə edilib, 100-dən çox teatrın səhnəsində oynanılıb.
