Etilen-polietilen zavodu Buxar Generator Kompleksinin modernizasiyasında sonra yaxın vaxtlarda istifadəyə veriləcək.
Sumqayıt24 xəbər verir ki, bu barədə 12-ci Beynəlxalq “Caspian Energy Forum”unda çıxış edən Almaniyanın "Uniper" şirkətinin Azərbaycan üzrə nümayəndəliyinin rəhbəri Rəşad Hüseynli deyib. Onun sözlərinə görə, Buxar Generator Kompleksinin enerji effektivliyinin və istehsal gücünün artırılması layihəsi bitmək üzrədir və hazırda işlər tamamlama-sazlama mərhələsindədir.
"Biz layihəni, demək olar ki, bitirmişik və hazırda tamamalama-sazlama işləri yerinə yetirilir", - Rəşad Hüseynli qeyd edib.
O, əlavə edib ki, layihənin istifadəyə verilməsi, çox güman ki, Bakıda keçiriləcək BMT-nin İqlim Dəyişmələri üzrə Tərəflər Konfrasının 29-cu sessiyası (COP29) zamanı baş tutacaq.
Qeyd edək ki, SOCAR ilə Almaniyanın “Uniper” şirkəti tərəfindən yaradılan “SOCAR-Uniper” birgə müəssisəsi Sumqayıtda yerləşən zavodda Buxar Generator Kompleksini təmilləşdirərək enerji effektivliyinin 32 Mvt.s-dən 65 Mvt.s-yə çatdırılması layihəsini həyata keçirir.
Quraşdırılan turbogenerator, “Azərikimya”nın Sumqayıt Elektrik Şəbəkəsindən aldığı elektrik enerjisi tələbatını tam ödəməkdən başqa, istehsal olunacaq artıq elektrik enerjisini SOCAR-ın və Sumqayıt şəhərinin digər müəssisələrinə ötürməsinin də bu yarımstansiya üzərindən həyata keçirilməsini nəzərdə tutur. Aparılan modernizasiya işləri nəticəsində, zavodun propilen üzrə illik məhsuldarlığı 90-100 tondan 187 min tona, etilen üzrə illik məhsuldarlığı isə 100-120 min tondan 192 min tona qaldırılıb.
