Coratlı məşhur qəzəlxan Mahir Cürət xəstəxanaya yerləşdirilib. Bu barədə 1 dekabr tarixində ATV-yə istinadən xəbər veririk.
Eyni zamanda meyxana ustadı olan Mahirin ayaqlarında yaranan yaralar çoxalaraq ağırlaşıb. Hazırda sənətkar yeriməkdə çətinlik çəkir. Yardım məqsədilə "Bizimləsən" ictimai-sosial verilişinin çəkiliş heyəti, təcili yardım ilə birlikdə onun evinə yollanıb.
Müayinədən sonra sənətkar M. Topçubaşov adına Elmi Cərrahiyyə Mərkəzinə aparılıb. Burada o, təkrar müayinə olunub. Atasını tək qoymayan Mahir Cürətin oğlu onun səhhəti ilə bağlı bunları söyləyib:
"Atamın sağlıq vəziyyəti yaxşı olmur. Tez-tez dəyişir. Biz üç övladıq. Bir mən və iki bacım var. Atam çox sakit insandır. Sadəcə bu xəstəlik onun əsəb sistemini pozub. Yaraları onun əsəblərinə toxunub. Biz heç kimdən heç nə ummuruq və gözləmirik. Onun tələbələri var. Coratdan meyxanaçı Balabəy. O, atama baş çəkir, səhhəti ilə maraqlanır. Nənəm də atamdan çox nigarandır".
Bildirilib ki, həkim Mahir Cürətə əsəb sakitləşdirici iynə vurub və onunla profilaktik söhbətlər aparıb.
