Bəzi insanlar var ki, onlar heyvanlara xüsusi sevgi bəsləyirlər. Həmin şəxslər müxtəlif ev heyvanlarına sahiblənirlər. Sosial şəbəkələrdə dəvə saxlayan azərbaycanlı şəxsin videoları maraqla izlənilib. Buna təəccüblə yanaşanlar da az deyil.
Sumqayit24.az-ın əməkdaşı sosial şəbəkələrdə dəvəsi ilə məşhurlaşan Elnur İmanlı ilə həmsöhbət olub.
Həmin müsahibəni təqdim edirik:
- Elnur bəy, öncə özünüz haqqında məlumat verməyinizi istərdim.
- 1992ci ildə Sumqayıt şəhərində dünyaya göz açmışam.
- Heyvanlara sevginiz haradan qaynaqlanıb?
- Uşaqlıqdan heyvanları sevən biri olmuşam. Bu sevgini də mənə valideynlərim aşılayıb. Böyüyəndən sonra da bu sevgiyə sadiq qaldım.
- Sosial şəbəkədə dəvə ilə videolarınızı gördük. Maraqla qarşıladıq. Necə oldu ki, dəvə saxlamaq qərarına gəldiniz?
- Dəvə ilə videolarımı sosial şəbəkələrdə paylaşmaqda məqsədim insanlara xoş enerji ötürmək və heyvanlara sevgini aşılamaqdır. Bir dəfə internetdə satış səhifələrinin birində dəvənin satıldığını gördüm. Dəvə çox zəif idi. Ağlıma dəvələrin möcüzəvi olduqları və peyğəmbərimizin dəvəsinin ona sadiq olduğunu xatırladım. Və belə qərara gəldim ki, dəvəni satın alım.
- Dəvəni neçə ildir saxlayırsınız?
- İki ilə yaxındır ki, dəvəni saxlayıram. Hazırda üç yaşı var. Adı Momudur. Adını dostum Vüsal qoyub. Vüsal da ən azı mənim kimi o dəvəyə baxır. Üzərində əziyyəti var. Dəvəm hazırda dostum Vüsalın atları ilə birlikdə isti və təmiz yerdə saxlanılır.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva bir heyvansevər kimi Qobustanda təşkil olunan tədbir zamanı dəvəmə yaxınlaşıb, öz sevgisini göstərib.
- Heyvanlarından öz məqsədləri üçün istifadə edənlərə münasibətiniz necədir?
- Men heyvana əziyyət vermədən işlədən insanlara pis baxmıram. Nəticə etibarı ilə normasında işlədib, evlərinə halal pul aparırlar. Axı heyvanların da böyük tələbatları var. Onları da qarşılamaq lazımdır.
- Sizdən dəvənizi almaq istəyən olubmu? Çünki bəzi işbazlar dəvə ətindən istifadə üçün onu satın alıb, istifadə etmək istəyirlər. Buna münasibətiniz necədir?
- Dəvəmi almaq istəyən çox olub. Sırf ətindən istifadə üçün almaq istədiklərini bilirdim. Bütün təklifləri rədd etmişəm.
- Dəvənizlə başınıza gələn maraqlı hadisədən danışardınız.
- Bir dəfə mən atla dəniz sahilində gəzirdim. Arxadan dəvəm məni gördü. Qaçaraq gəlib, qolumdan tutdu. Qısqanclığını göstərdi. Həmin görüntüləri sosial şəbəkədə 1 milyona yaxın şəxs bəyəndi, 26 milyon nəfər tərəfindən izlənildi. Dünyanın bir çox ölkələrində də paylaşıldı.
- Sonda nə demək istəyərdiniz?
- Bir daha dəyərli Azərbaycan xalqıma demək istəyirəm ki, qarşıdan soyuq qış fəsli gəlir. Hər birindən xahiş edirəm ki, çöldəki sahibsiz heyvanlara isti yer və yemək versinlər.
Nəzrin Vahid
