1918-ci ildə Azərbaycan ilk dəfə öz müstəqilliyini elan etdikdən sonra onun əsas dövlət atributlarından biri olan bayrağın necə olması mühüm əhəmiyyət kəsb edirdi. Azərbaycan Cümhuriyyətinin bayraq haqqında ilk hökumət qərarı 21 iyun 1918-ci ildə verilib. Həmin qərarda Azərbaycanın ilk Dövlət Bayrağı qırmızı rəngli, orta hissəsində ağ aypara və səkkizguşəli ulduzun təsviri verilmiş şəkildə qəbul edilmişdir.
9 noyabr 1918-ci ildə Azərbaycan Xalq Cümhuriyyətinin hökumət başçısı Fətəli xan Xoyskinin məruzəsi əsasında Azərbaycanın üçrəngli, ay-ulduzlu bayrağı Dövlət Bayrağı kimi təsdiq edildi. 7 dekabr 1918-ci ildə Azərbaycan Xalq Cümhuriyyətinin Parlamentinin açılışı zamanı həmin bayraq binanın üzərində dalğalanmağa başladı.
18 oktyabr 1991-ci ildə “Azərbaycan Respublikasının dövlət müstəqilliyi haqqında” Konstitusiya Aktı ilə Azərbaycan Respublikası Azərbaycan Xalq Cümhuriyyətinin varisi kimi onun dövlət rəmzlərini, o cümlədən Dövlət Bayrağını bərpa etmişdir.
Azərbaycan Respublikasının Dövlət Bayrağı bərabər enli üç üfüqi zolaqdan ibarətdir. Yuxarı zolaq mavi, orta zolaq qırmızı, aşağı zolaq yaşıl rəngdədir. Mavi rəng - Azərbaycan xalqının türk mənşəli olmasını, qırmızı rəng - müasir cəmiyyət qurmaq, demokratiyanı inkişaf etdirmək istəyini, yaşıl rəng isə İslam sivilizasiyasına mənsubluğunu ifadə edir. Qırmızı zolağın ortasında bayrağın hər iki üzündə ağ rəngli aypara ilə səkkizguşəli ulduz təsvir edilmişdir.
Prezident İlham Əliyevin 17 noyabr 2009-cu il tarixli Sərəncamına əsasən, hər il 9 Noyabr Azərbaycanda Dövlət Bayrağı Günü kimi qeyd edilir.
Mənbələr:
