Azərbaycanda minimum əməkhaqqının artırılacağı gözlənilir.
Maaşların 2024-cü illə müqayisədə 55 manat, yaxud 15,9% qalxacağı bildirilir. Bu, “Hesablama Palatasının Azərbaycan Respublikasının 2025-ci il dövlət büdcəsi haqqında” qanun layihəsinə rəyində əksini tapıb.
Qeyd edək ki, hazırda minimum əməkhaqqı 345 manatdır. Yəni, işəgötürənlər işçilərinə bu məbləğdən aşağı məvacib verə bilməzlər.
İnsanları düşündürən əsas nüanslardan biri isə sözügedən artımın özəl sektora təsir edib-etməyəcəyidir.
Mövzu ilə bağlı Yenisabah.az-a danışan iqtisadçı-ekspert Emin Qəribli bildirib ki, özəl sektorda maaş artımı alıcılıq qabiliyyətinin yüksək olmasından asılıdır:
“Maaşlar və pensiyalar artırıldığı zaman, təbii ki, alıcılıq qabiliyyəti də artır. Belə olduqda isə sahibkarların qazancları da yüksəlir. Ölkəmizdə fəaliyyət göstərən sahibkarlar əsasən, kiçik sahibkarlardır. Onlar da daha çox daxili bazara yönəliblər. Daxili bazarda da alıcılıq qabiliyyəti artırsa, təbii ki, onların fəaliyyətinə də təsir göstərir. Onların istehsal etdiyi məhsul, təklif etdiyi xidmət müqabilində qazancları da artmış olur. Özəl sektorda maaş artımı isə bilavasitə qazancın yüksək olmasından və keyfiyyətin artmasından asılıdır”.
Ekspertin fikrincə, minimum əməkhaqqının artırılması sahibkarların da özəl sektorda maaşları artırmağa vadar edəcək:
“Minimum əməkhaqqının artırılması sahibkarların müəyyən etdikləri şərti maaşları artırmağa vadar edir. Bu isə “qara mühasibatlığın” azalmasına və daha şəffaf sistemə keçid imkanları yaradır. Amma dövlətin özəl sektorda maaş artımına birbaşa müdaxilə etməsi mümkün deyil”.
