Bakı–Sumqayıt ekspres qatarında yaranan işıq problemi və sərnişinlərin təhlükəsizlik narahatlıqları ilə bağlı açıqlama verilib.
"Azərbaycan Dəmir Yolları" QSC-nin mətbuat katibi Bəxtiyar Hacıyev Sumqayit24.az-a açıqlamasında bildirib ki, 21 yanvar saat 18:05-də Bakı Dəmiryol Vağzalından yola düşən qatarın vaqonlarında işıqlandırma ilə bağlı nasazlığın yaranması araşdırılıb və qatarın daxili enerji paylayıcı şəbəkəsində qəfil gərginlik dəyişməsi qeydə alınıb:
"Bu zaman təhlükəsizlik məqsədilə avtomatik qoruma sistemi işə düşüb və işıqlandırma bloklanıb. Qatarın texniki heyəti tərəfindən problem qısa zamanda aradan qaldırılıb. Hərəkətin təhlükəsizliyinə heç bir təsir olmayıb.
Sərnişinlərimizə göstərdikləri səbir və anlayışa görə minnətdarlığımızı bildiririk.
Əlavə olaraq qeyd edək ki, ADY-nin qatarları hər gün texniki baxışdan keçirilir, istismara yararlı olmayan hər hansı hərəkət tərkibi heç bir halda istifadəyə verilmir".
Xatırladaq ki, Bakı-Sumqayıt qatarının qaranlığa bürünməsi sərnişinlər arasında narazılıq yaratmışdı. Vətəndaş əyləclər və təkərlərin də işıq sistemi kimi yoxlanılmasından narahatlığını ifadə etmişdi.
