Ali Məhkəmədə oğurluq və dələduzluqda ittiham olunan Rəşvin Məmmədzadənin işi üzrə kassasiya şikayətinə baxılıb.
Məlumata görə, hakim İlqar Qılıcovun sədrliyi ilə keçirilən iclasda zərərçəkmişin şikayəti təmin edilməyib.
İttihama əsasən, Rəşvin Məmmədzadə "Tap.az" vasitəsilə tanış olduğu şəxslərin etibarını qazanaraq müxtəlif vədlərlə onların pul və əmlakını ələ keçirib.
O, bir şəxsin Sumqayıtdakı 3 sot torpaq sahəsini sataraq 12 min manatı, daha sonra isə həmin şəxsdən əlavə pul və 6 560 manatlıq qızıl-zinət əşyalarını mənimsəməkdə ittiham olunub.
Digər zərərçəkmişlərdən birinin "Nissan Micra" markalı avtomobilini sataraq, əldə ediləcək vəsaitin üzərinə öz pulunu əlavə etməklə xaricdən "Hyundai Elantra" gətirməyi vəd edib. Avtomobil 2022-ci ilin mayında Sumqayıtda fəaliyyət göstərən avtosalonda başqa şəxsə satılıb, satışdan əldə edilən 6 000 manat isə onun tərəfindən ələ keçirilib.
Digər şəxslərə xaricdən avtomobil gətirmək, bank hesabı açmaq və mənzil almağa kömək etmək vədləri ilə on minlərlə manat aldığı bildirilib. İttihama görə, ən ağır epizodlardan birində o, bir qadının mənzilini sataraq əldə olunan 70 min manatı, həmçinin ev və qızıl-zinət əşyalarını ələ keçirib.
Məhkəmənin hökmü ilə Rəşvin Məmmədzadə oğurluq və dələduzluqda təqsirli bilinərək 7 il 11 ay 29 gün müddətinə azadlıqdan məhrum edilib. Bakı Apellyasiya Məhkəməsi hökmü qüvvədə saxlayıb, Ali Məhkəmə isə son kassasiya şikayətini təmin etməyib.
Qeyd edək ki, ittihama görə, Rəşvin Məmmədzadə 3 qadın və 1 kişiyə qarşı dələduzluq edib. O, qadınlarla işlə bağlı tanış olduqdan sonra evlənmək təklifləri edərək onların etibarını qazanıb.
Mənbə: Pravda.az
