Qəbul imtahanında yüksək bal toplayan iki abituriyentimiz universitetə qəbul olub.
Sumqayit24.az-ın əldə etdiyi məlumata görə, bu il II ixtisas qrupu üzrə qəbul imtahanının ikinci mərhələsində maksimum nəticə – 400 bal göstərən sumqayıtlı və saraylı abituriyentin də hansı universitet və ixtisasa qəbul olduğu məlum olub.
Belə ki, Sumqayıt şəhəri Təbiət Elmləri Təmayüllü Gimnaziyanın məzunu Əli Məmmədzadə ADA Universitetində Hüquqşünaslıq ixtisası üzrə təhsil alacaq.
O, universitetə qəbul olması ilə bağlı ilk təəssüratlarını Sumqayit24.az-a danışıb:
"Arzuladığım universitetin tələbəsi olacağım üçün çox şadam. Nəticələri gördüyüm an böyük sevinc və qürur hissi yaşadım. Bu uğurumun sadəcə bir başlanğıc olduğunu düşünürəm və gələcəkdə daha da böyük nailiyyətlər əldə etməyə çalışacağam".
Qeyd edək ki, Əli Məmmədzadə ikinci mərhələdə maksimum nəticə olan 400 bal, birinci mərhələdə isə 289,6 bal toplayıb. Bununla da onun iki mərhələ üzrə yekun nəticəsi 689,6 bal təşkil edib.
Digər abituriyentimiz isə Saray qəsəbə 1 nömrəli tam orta məktəbin məzunu Orxan Mənsimlidir.
Orxan Mənsimli birinci mərhələdə 276,1 bal toplayıb. Beləliklə, onun iki mərhələ üzrə yekun nəticəsi 676,1 bal olub. O, ADA Universitetinin Hüquqşünaslıq ixtisasına qəbul olub.
Orxan Mənsimli də universitetə qəbul olması ilə bağlı ilk təəssüratlarını Sumqayit24.az-a danışıb:
"Sevincli və qürurluyam. Mənim üçün nəticə gözlənilən idi, çünki balım yüksək idi.
Seçim zamanı bal statistikası ilə plan yerlərini müqayisə etmişdim və haraya düşəcəyimi təxminən bilirdim".
