Sumqayıtdan ilk dəfə millət vəkili adını qazanacaq namizədlər siyahısında Mehriban Vəliyevanın da adı var. İlkin nəticələrə əsasən o, 44 saylı Sumqayıt üçüncü seçki dairəsindən qalibdir.
Sumqayıt24 xəbər verir ki, Mehriban Vəliyeva 1964-cü ildə Bakı şəhərində anadan olub. 1988-ci ildə Azərbaycan Dövlət Universitetinin (red. Bakı Dövlət Universiteti) filologiya fakültəsini bitirib. 1989-cu ildən pedaqoji fəaliyyətə başlayıb. Filologiya üzrə fəlsəfə doktorudur. Vəliyeva Azərbaycan Respublikasının Əməkdar müəllimidir (2013). O, “Ən yaxşı müəllim” müsabiqəsinin (1996 və 2009) və “İlin ən yaxşı pedaqoji mühazirəsi” müsabiqəsinin (1997 və 1998) qalibi olub. Dəfələrlə fəxri fərman və diplomlara layiq görülüb. Bir sıra dərslik, dərs vəsaitləri və məqalələr müəllifidir.
Qeyd edək ki, Mehriban Vəliyeva Bakı Şəhəri üzrə Təhsil İdarəsinin (BŞTİ) müdiri vəzifəsində çalışıb. Hazırda isə Məktəbəqədər və Ümumi Təhsil üzrə Dövlət Agentliyinin direktor müavinidir.
Ailəlidir, 3 övladı var.
