Qeyri-adi və heyrətamiz hadisələrin təqdimatından yaranan “Ginnesin Rekordlar Kitabı” dünyada ən uğurlu nəşr sayılır. Ötən il bu kitab 100 milyon tirajla satılıb.
Belçikada yaşayan və həyatının 25 ilini qrafika sənətinə həsr etmiş Fəxrəddin Vəliyev rekordlar kitabına düşmüş ilk azərbaycanlıdır. F. Vəliyevin Sumqayıt24-ə verdiyi məlumata görə, o, Sumqayıtda boya-başa çatıb. 2004-cü ildə 5 dəqiqəyə 20 nəfərin siluetini çəkməklə rekordçu adını qazanıb.
Həmyerlimiz 1992–1995-ci illərdə Afinada və İstanbulda fərdi sərgilər təşkil edib, 2003-cü ilin dekabrında "Belqium" muzeyində Belçika kraliçasının rəsmini çəkib. Kraliça isə ona məktub vasitəsilə təşəkkürünü bildirib.
Fəxrəddin Vəliyev Azərbaycanın Belçikada tanınması üçün də xeyli işlər görüb. O, hazırda bu ölkədəki Avropa–Azərbaycan diaspor mərkəzinin vitse-prezidentidir.
