Sumqayıtda tibb ocağının vəziyyəti narahatlıq doğurur.
Sumqayit24.az xəbər verir ki, Sumqayıt Tibb Mərkəzinin tabeliyində fəaliyyət göstərən 1 nömrəli Ailə Sağlamlıq Mərkəzi (ASM) baxımsız vəziyyətə düşüb. 9-cu mikrorayonda yerləşən bu tibb müəssisəsində divarlar çatlayıb, pəncərələr isə qırılıb.
Qapının bağlanması üçün tutacağına əski parçası bağlanması isə vəziyyətin nə qədər acınacaqlı olduğunu açıq şəkildə göstərir.
Mərkəzdə oturacaqlar yararsız hala düşüb, tavandan isə skoçla bərkidilmiş kabel sallanaraq həm pasiyentlər, həm də personal üçün ciddi təhlükə yaradır.
Səhiyyə müəssisələri vətəndaşların sağlamlığının qorunduğu məkanlar olmalıdır. Lakin buradakı vəziyyət əksinə, əlavə risklər yaradır. Məsul qurumların məsələyə operativ reaksiya verməsi və yaranmış problemlərin qısa zamanda aradan qaldırılması zəruridir.
