Sumqayıt 75 illiyini keçirməyə hazırlaşır.
“Qaynarinfo”nun məlumatına görə, Sumqayıt Şəhər İcra Hakimiyyəti bununla bağlı tender elan edib. Müsabiqənin qalibi “UMA” MMC seçilib. İcra hakimiyyəti ilə şirkət arasında bağlanacaq satınalma müqaviləsinin maliyyə dəyəri 249.180,6 manatdır.
“UMA” MMC 10 manatlıq nizamnamə kapitalı ilə yaradılıb. Dövlət Vergi Xidmətinin reyestr məlumatlarında şirkətin qeydiyyata alındığı tarix qeyd edilməyib. Araşdırma zamanı məlum olub ki, UMA MMC 2013-cü ildən fəaliyyət göstərir.
Şirkətin hüquqi ünvanı Sumqayıt şəhəri, 17-ci mikrorayon, ev 29A, mənzil 15-də yerləşir. “UMA” MMC-nin qanuni təmsilçisi isə Vəliyev Cavanşir Elxan oğludur.
Cavanşir Vəliyev həm də "Uptime Azərbaycan" MMC-nin qanuni təmsilçisidir. Şirkət 2019-cu ildə qeydiyyata alınıb. Hüquqi ünvanı Sumqayıt şəhəri, 18-ci mikrorayon, ev 42, mənzil 24-də yerləşib. Bu şirkətin nizamnamə kapitalı 50 manatdır.
Açıq mənbələrdə nə “UMA” MMC, nə də "Uptime Azərbaycan" MMC haqqında məlumat var. Cavanşir Vəliyev barəsində də hər hansı məlumata rast gəlinmir.
Dövlət satınalmalarının vahid internet portalında yerləşdirilən məlumatlardan isə aydın olur ki, adına heç yerdə rast gəlinməyən, barəsində hər hansı məlumat olmayan “UMA” MMC tenderlərdə fəal iştirak edir. MMC-nin qalib gəldiyi tenderlər üzrə satınalma predmetlərindən məlum olur ki, şirkət influser xidmətindən tutmuş, tanıtım və təlimat videoçarxlarının çəkilişinə qədər bir çox xidmətlər göstərir.
Sumqayıt Şəhər İcra Hakimiyyətinin tenderinə gəlincə, məlum olur ki, qurum şirkətdən bayraq, "Sumqayıt 75" loqosu yazılmış idman köynəkləri, papaq, lent bayraqlar və s. bu kimi mallar alacaq.
Əsası 1938-ci ildə qoyulan Sumqayıt 1949-cu ildə şəhər statusu alıb. Bu il şəhərin 75 illik yubileyidir.
