Şəfəq qəsəbəsinin problemləri bitmək bilmir.
“Stansiya Sumqayıt” adlanan ərazidə yerləşən və əvvəllər “Yeni şəhərcik” kimi tanınan qəsəbəyə bu status aprel ayında verilib. Şəfəq qəsəbəsinin ərazisi 258 hektardır və 9 minə yaxın əhalisi var.
Yerli sakinlərin sözlərinə görə, qəsəbənin yaradılmasından 7 aya yaxın vaxt keçsə də, hələlik əraziyə Abşeron Rayon İcra Hakimiyyətinin nümayəndəsi təyin edilməyib:
“Binaların qarşısı it sürülərinin oylağına çevrilib. Köpək səsindən gecə-gündüz qulaq tutulur. Axşamlar qorxudan evdən bayıra çıxa bilmirik. Üstəlik mobil şəbəkə ilə də problem yaşayırıq. Abşeron RİH-dən isə bildirilir ki, bu məsələ yalnız nümayəndə təyin edildikdən sonra həll oluna bilər.
Biz daha çox gözləməliyik? Niyə nümayəndələrini təyin etmirlər? Öz dərdimizi kimə deyək?”
Vətəndaşlar ictimai nəqliyyatla bağlı problemdən də əziyyət çəkirlər. Həmin əraziyə, Sumqayıtdan 12A, Bakıdan isə 533 saylı marşrut avtobusları hərəkət edir. Buna baxmayaraq, həmin avtobuslar yalnız saat 20:30-dək fəaliyyət göstərir.
“İşdən gec çıxırıq və sonuncu avtobusa minə bilmirik. Nəqliyyat vasitələrində də vəziyyət ürəkaçan deyil. Aidiyyəti qurumlara bununla bağlı müraciət etsək də, məsələmiz həll olunmayıb”, - deyə sakinlər əlavə ediblər.
