Saray qəsəbəsinin mərkəzinin işıqlandırılmaması ilə bağlı açıqlama verilib.
Abşeron Rayon İcra Hakimiyyətinin mətbuat katibi Seymur Qasımbəyli Sumqayit24.az-ın sorğusuna cavab olaraq bildirib ki, qəsəbədə gecə işıqlarının bərpası ilə əlaqədar işlərin görülməsi planlaşdırılıb:
"Hal-hazırda yol kənarlarındakı gecə işıqları sistemlərinin təhvil-təslim prosesi həyata keçirilir. Gecə işıqlandırılması sistemlərinin rayon İcra Hakimiyyətinin balansına keçdikdən sonra işıqlandırılmanın bərpası və təmin edilməsi üçün vəsait nəzərdə tutulmuşdur".
Qurumun əməkdaşı "gecə işıqlandırılması sistemlərinin hazırda hansı qurumun balansındadır?", "Nə zaman rayon İcra Hakimiyyətinin balansına keçəcəcək?" suallarını isə cavabsız qoyub.
Xatırladaq ki, Saray qəsəbəsinin ən işlək hissəsi olan Heydər Əliyev prospekti uzun müddətdir tam qaranlığa qərq olub. Burada tez-tez qəzalar baş verir. Məsələnin dəfələrlə qaldırılmasına baxmayaraq, Abşeron RİH problemi yalnız növbəti "tezliklə həll olunacaq" vədləri ilə uzadır. Qurum bu işıqlandırma məsələsini hər il müxtəlif bəhanələrlə geri atır və prospektin niyə qaranlıq qaldığı barədə dəqiq izahat verilmir.
