Bu gün sumqayıtlı şəhidlərin anım günüdür.
44 günlük Vətən müharibəsində şəhid olan əsgərlərimizdən biri də Eltun Əliyevdir. O, 29 avqust 2001-ci ildə Sumqayıt şəhərində anadan olub.
Anasının sözlərinə görə, Eltun uşaqlıqdan zəhmətkeş olub, demək olar ki, ailəni özü dolandırıb. Hətta indi yaşadıqları evi də anası ilə Eltun birgə alıblar. Şəhidimizin ən böyük arzusu yaşadıqları evi boyütmək idi.
“Mənə dedi ki, sağ-salamat qayıdım, o balaca evimizi qardaşım və mən işləyib böyüdəcəyik”, – deyə şəhid anası Rima Əliyeva bildirib..
Eltun Əliyev 24 saylı məktəbdə təhsil alıb. Məzun olduqdan sonra, 2019-cu ildə hərbi xidmətə yollanıb. Tərtər yaxınlığında yerləşən hərbi hissədə, ön xətdə, baş atıcı olaraq xidmət edib.
Sentyabrın 27-də İkinci Qarabağ müharibəsinə qatılıb. Füzuli, Cəbrayıl və Suqovuşanda vuruşub. Döyüş yoldaşları Eltunun böyük cəsarət, qəhrəmanlıq göstərdiyini deyiblər.
19 yaşlı Eltun Əliyev 16 oktyabr 2020-ci ildə Suqovuşanda şəhadətə ucalıb. Oktyabrın 23-də Sumqayıt şəhərindəki Şəhidlər xiyabanında dəfn edilib.
Ölümündən sonra “Vətən uğrunda” medalına layiq görülüb.
Anım günü olan digər şəhidimiz isə Elvin Novruzovdur.
Elvin 3 may 2001-ci ildə Sumqayıtda anadan olub. Tofiq İsmayılov adına 29 nömrəli məktəbdə oxuyub. 2019-cu il iyunun 22-də hərbi xidmətə yollanıb. İkinci Qarabağ müharibəsində iştirak edib.
23 oktyabr 2020-ci ildə Qubadlının azadlığı uğrunda döyüşlərdə qəhrəmancasına həlak olub. Sumqayıt Şəhidlər xiyabanında dəfn edilib.
Şəhadətindən sonra “Vətən uğrunda”, “Cəbrayılın azad olunmasına görə” və “Qubadlının azad olunmasına görə” medallarına layiq görülüb.
