İlkin nəticələrə əsasən, ilk dəfə seçiləcək namizədlər siyahısında tənqidçi Elnarə Akimovanın da adı var. Sumqayit24.az xəbər verir ki, o, 46 saylı Sumqayıt beşinci seçki dairəsindən qalib namizəddir.
Elnarə Akimova 1978-ci il yanvarın 28-də Sumqayıtda anadan olub. 1995-ci ildə burada Tofiq İsmayılov adına 29 saylı orta məktəbi bitirib. Bakı Dövlət Universitetinin filologiya fakültəsində bakalavr və magistr təhsili alıb.
Akimova 2001-ci ildən ədəbiyyat tarixçisi kimi elmi və çağdaş ədəbi prosesdə tənqidçi kimi fəaliyyətə başlayıb. 2004-cü ildən Azərbaycan Yazıçılar Birliyinin üzvüdür. Cəfər Cabbarlı Komissiyasının üzvü, Azərbaycan Mədəniyyət Nazirliyinin "Qızıl Kəlmə" mükafatının ekspertidir. 2015-cü ildən ölkənin nüfuzlu "Ədəbiyyat qəzeti"ndə Azərbaycan ədəbiyyatının yaradıcıq problemlərindən bəhs edən elmi-nəzəri yazılarla çıxış edir.
2017-ci ildə "Müstəqillik dövrü Azərbaycan poeziyası müasir ədəbi təmayüllər kontekstində" mövzusunda doktorluq dissertasiyası müdafiə edib. Hazırda filologiya elmləri doktoru, dosent, AMEA Nizami Gəncəvi adına Ədəbiyyat İnstitutunun "Uşaq ədəbiyyatı" şöbəsinin və "Ədəbiyyat qəzeti"ndə ədəbiyyatşünaslıq şöbəsinin müdiridir.
10-dan artıq kitab, 100-lərlə məqalənin müəllifidir. Elnarə Akimova çox sayda beynəlxalq elmi konfrans və simpoziumların iştirakçısıdır və məqalələri nüfuzlu xarici və ölkə elmi məcmuələrində dərc olunub.
Müxtəlif Dissertasiya Şuralarında ekspert və opponent kimi çıxışlar edir.
Yeni Azərbaycan Partiyasının VII qurultayında (5 mart 2021-ci il) YAP İdarə Heyətinin üzvü seçilib.
Ailəlidir, 2 oğlu var.
