Azərbaycan Kibertəhlükəsizlik Mərkəzi (AKM) təlimlərinin yeni V dalğası üçün qeydiyyat başlayır.
Sumqayit24.az xəbər verir ki, Sumqayıt Dövlət Universitetində (SDU) AKM –in infosessiyası keçirilib. Elm və innovasiyalar üzrə prorektor dosent Elşad Abdullayev təlimin vacibliyindən danışıb, yaşadığımız informasiya texnologiyaları əsrinin ən böyük problemlərindən birinin kiber təhdidlər olduğunu vurğulayıb.
Onun sözlərinə görə, ölkəmizdə bu sahədə ciddi tədbirlər aparılır. Bu kimi kiberhücumlardan qorunmaq üçün belə təlimlərin keçirilməsi xüsusi əhəmiyyət kəsb edir.
Azərbaycan Kibertəhlükəsizlik Mərkəzinin icma meneceri Leyla Kərimli çıxış edərək mərkəz haqqında məlumat verib. Mərkəzin həyata keçirdiyi layihələrin vacibliyini qeyd edərək, tələbələri aktiv olmağa və AKM-ə qoşulmağa çağırıb.
Daha sonra AKM-nin mütəxəssisi Fərzəli Vəliyev təmsil etdiyi mərkəzin fəaliyyəti və mərkəz tərəfindən təşkil olunan sözügedən təlimlərin mahiyyəti və seçim prosesi haqqında təqdimatla çıxış edib. Bildirilib ki, Azərbaycan Kibertəhlükəsizlik Mərkəzi 2023-cü ildə təsis edilib. Xarici təlimçilər komandası tərəfindən Technion universitetinin təlim proqramına əsasən keçirilən təlimlərdə nəzəri və praktiki biliklər paralel olaraq tədris edilir. Təlimlər 6 ay müddətinə qədər davam edir. Hər təlim periodu üçün 60 nəfər mütəxəssisin hazırlanması nəzərdə tutulur. Təlimlərdə 2 növ mütəxəssis hazırlanır: Red Team və Blue Team. Təlimi uğurla bitirənlərə Technion universitetinin rəsmi sertifikatı veriləcək.
Təqdimatda mövcud kibertəhdidlər haqqında geniş məlumat verilib. Təlimçi həmçinin “Purple team” təlimlərinə start verildiyini diqqətə çatdırıb.
Qeyd olunub ki, təlimlərin məqsədi ölkədəki kibertəhlükəsizlik kadrlarının ən yüksək səviyyədə bilik və bacarıqlarını formalaşdırmaqdır. Tədbirin sonunda tələbələr fəallıq nümayiş etdirərək mövzu ilə bağlı AKM-in nümayəndələrinə çoxsaylı suallar veriblər.
