Vətən müharibəsi şəhidi Cavid Cəfərovun bu gün doğum günüdür. O, 1 dekabr 1993-cü ildə Sumqayıtda anadan olub.
Cavid Cəfərov 2009-cu ilə kimi 33 nömrəli məktəbdə təhsil alıb. Daha sonra, 2009-2013-cü illərdə Sumqayıt Dövlət Texniki Kollecində oxuyub. O, kolleci "Nəqliyyatda daşımaların və idarəetmənin təşkili” ixtisası üzrə bitirib.
MAXEHQ vəzifəsində çalışan Cavid 1 oktyabr 2020-ci ildə Füzuli istiqamətində gedən döyüşlərdə şəhadətə yüksəlib. Döyüş yoldaşlarının dediyinə görə, o, yaralı komandirini ərazidən çıxarmağa çalışarkən snayper gülləsinə tuş gəlib.
Anası Nəzakət xanımın sözlərinə görə, Cavidin doğum günündə onun üçün nişan aparmağı planlaşdırırdı. Bunun üçün artıq nişan üzüyü də alınmışdı. İndi Cavidin nişan xonçaları onun Sumqayıt Şəhidlər xiyabanındakı məzarının üzərinə qoyulub.
