Azərbaycan Milli Konservatoriyasının nəzdində Sumqayıt Musiqi Kollecində bu gün Milli Musiqi Gününə həsr olunmuş tədbir keçirilib.
Məlumata görə, tədbir Azərbaycan Respublikasının Dövlət Himninin hərbi orkestrin ifasında səsləndirilməsi ilə başlayıb.
Daha sonra Üzeyir Hacıbəylinin əsərlərindən ibarət konsert proqramı təqdim olunub. Kollecin müəllim və tələbələrinin iştirakı ilə hazırlanan proqramda bəstəkarın əsərləri solo, duet, orkestr və xor ifalarında səsləndirilib.
Konsertin sonunda Əməkdar artist Arzu Əliyeva, II Respublika Muğam Müsabiqəsinin qalibləri Güllü Muradova və Aytən Məhərrəmova, V Muğam Televiziya Müsabiqəsinin qalibi Sədəf Budaqova, eləcə də Sumqayıt Musiqi Kollecinin tələbələrinin ifasında "Qarabağ şikəstəsi" təqdim olunub.
Tədbirin məqsədi Üzeyir Hacıbəyli yaradıcılığının təbliği, milli musiqi dəyərlərinin yaşadılması, həmçinin gənc ifaçıların yaradıcılıq potensialının və ifaçılıq bacarıqlarının nümayiş etdirilməsi olub.
Mənbə: Azərtac
