Azərbaycanın əksər bölgələrində insanlar küçə itlərinin çoxalmasından narahatdırlar. Bu problem daha çox Sumqayıt, Bakı, Gəncə, Lənkəran və Xırdalan kimi iri şəhərlərdə, habelə Quba və Xaçmaz rayonlarında aktualdır. Yerli mediada tez-tez itlərin uşaqlara, vətəndaşlara hücum etməsinə, onları dişləməsinə dair xəbərlər yayılır.
Təbii olaraq beyinlərdə “Bəs küçə itləri insanlara hansı hallarda hücum edir? Niyə küçə itinin insana qarşı aqressivliyi yaranır? İtlərdən necə qorunmaq olar?” kimi suallar yaranır.
Sumqayit24.az qeyd olunan suallarla Daxili İşlər Nazirliyinin Daxili Qoşunlarının partlayıcı və sursat axtarışı üzrə xüsusi hərbi hissənin baş kinoloqu olmuş Nicat Əhmədliyə müraciət edib. Kinoloqun sözlərinə görə, küçə itlərindən qorunmağa ehtiyac yoxdur, onlarla düzgün davranış qaydasını bilmək və qıcıqlandırmamaq yetərlidir:
“Məsələn, itlər üstümüzə sürü şəklində cumur. Bu zaman insan tərpənməməli, olduqca soyuqqanlı olmalıdır. Amma təbii ki, heç kim belə soyuqqanlı olmağa məcbur deyil, çoxu bunu bacara bilməz. Bunu bacarmayanlara isə ətrafı izləmək, itlərin sürü halında gəzdiyi yerlərdən maksimum uzaq durmalarını məsləhət görürəm”.
Foto Sumqayıt24
Nicat Əhmədli itlərin insanlara hücüm etmə səbəblərinə də toxunub:
“İt sürüsü onların ərazisinə daxil olan, potensial təhlükə kimi gördükləri insanlara, həmçinin balalarını qorumaq məqsədilə hücum çəkir. Biz həmin balaları görməsək də, onlar yaxınlıqda, hansısa ağacın və kolun dibində olurlar. Bu səbəblər xaric itlər elə də hücum eləmirlər.
Bir də, təbii ki, çox şiddət görmüş itlər insanları qapır. Məsələn uşaqlar, habelə böyüklər itləri daşlayırlar, normadan kənar davranırlar. Nəticədə həmin heyvanlar insana qarşı həssas olur, daha çox təhlükə gözlədikləri üçün instiktiv şəkildə özlərini qorumağa çalışırlar.
Amma onlara qarşı hər-hansı təhlükə yoxdursa hücum etmirlər. İnsanlar it sürüsünə yaxınlaşanda hücuma məruz qalıb-qalmayacaqlarını əvvəlcədən anlaya bilərlər. Misal üçün, itlərin hamısı ayağa qalxırsa və ya, sürünün başçısı ayağa qalxıb, quyruğunu dikəldibsə, deməli hücum etməyə hazırlaşır".
