Sumqayıtda 36 yaşlı Şahmar şəxsi münasibətlər zəminində yaranan mübahisə zamanı həyat yoldaşı Gülxara (adlar şərti verilib – red.) xəsarət yetirib.
Demokrat.az-ın məlumatına görə, hadisəni törədən Şahmarın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Şahmar ona elan olunmuş ittiham üzrə özünü təqsirli bilib. O, ifadəsində göstərib ki, 2014-cü ildə Gülxar ilə evlənib, birgə nikahından bir qız övladı var: “Sonradan mən Gülxarla boşandım. Lakin buna baxmayaraq Gülxarla birlikdə eyni evdə yaşadım. Hazırda mənim maddi sıxıntılarım olduğu üçün mütəmadi olaraq Gülxar münaqişə yaradıb, söyüşlər söyüb”.
Təqsirləndirilən şəxs qeyd edib ki, hadisə günü, saat 22:00 radələrində yaşadığı evdə yenə aralarında münaqişə yaranıb: “Bu zaman mən Gülxara irad bildirdim. Gülxar ünvanıma söyüşlər söydü. Bundan sonra Gülxarın sifətinə əlimin içi ilə zərbə vurdum. Gülxar mənə müqavimət göstərərək məni vurmağa çalışdı. Həmin vaxt Gülxarın boynundan tutaraq sıxdım və sol qolundan tutaraq burdum, özümdən kənara itələdim. Daha sonra isə Gülxar başqa söyüşlər söyməyə davam etdi. Münaqişədən qaçmaq üçün evdən getdim. Mən evdən çıxan zaman Gülxar artıq Daxili İşlər Nazirliyinin 102 xidmətinə zəng edərək məlumat verdi. Etdiyim əməldən peşman olmuşam. Gələcəkdə belə hallara yol verməyəcəm”.
İş üzrə zərərçəkmiş Gülxarın sözlərinə görə, Şahmar ailəsini maddi cəhətdən təmin etmədiyi üçün və ailəsinə lazımı qayğı, diqqət göstərmədiyi üçün ondan boşanıb: “Lakin buna baxmayaraq bizim ayrı qalmağımızın azyaşlı övladıma pis təsir etdiyini gördüm. Həmin vaxtlarda da Şahmar məndən üzr istəyib barışmaq istədi. Mən Şahmarla barışdım və birlikdə yaşadıq. Şahmar yenə ailəsini maddi cəhətdən təmin edə bilmədi. Evə iki gün gəldi, üç gün gəlmədi”.
Gülxar qeyd edib ki, hadisə günü saat 22:00-da yaşadığı evdə yenə aralarında maddi çətinliklərə görə münaqişə yaranıb: “Mən Şahmarın evə baxmadığımı bildirdim. Şahmarın ünvanına söyüşlər söydüm. Bundan sonra sifətimə əlinin içi ilə zərbə vurdu. Boynumdan tutub sıxdı və sol qolumdan tutaraq burdu. Daha sonra isə mobil telefonumu götürərək Daxili İşlər Nazirliyinin 102 xidmətinə zəng edərək məlumat verdim”.
Bu cinayət işinə Sumqayıt Şəhər Məhkəməsində baxılıb. Məhkəmənin hökmü ilə Şahmar 300 manat miqdarında cərimə olunub.
