Sumqayıtda faaliyyət göstərən şirkət cərimələnib.
Söhbət mühərrik və sənaye yağlarının istehsalçısı olan “Technoil” MMC-dən gedir. İqtisadiyyat.az-ın əldə etdiyi məlumata görə, şirkət xarici valyuta vəsaitlərini xaricdən qaytarmadığı üçün ziyana düşüb.
Müvafiq qurum tərəfindən MMC barəsində İnzibati Xətalar Məcəlləsinin 483-cü (Xarici valyuta vəsaitlərinin xaricdən qaytarılmaması) maddəsinə əsasən cərimə protokolu tərtib edilib.
Daha sonra protokol baxılması üçün Sumqayıt Şəhər Məhkəməsinə göndərilib. Məhkəmədə barəsində protokol tətbiq edilən şirkətlə bağlı müraciətə baxılıb.
Hakim Vüsalə Qasımovanın sədrliyi ilə keçirilən prosesdə qərar elan olunub. Qərara əsasən, “Technoil”ə inzibati tənbeh tətbiq edilib, yəni cərimə kəsilib.
Xarici valyuta vəsaitlərinin xaricdən qaytarılmamasına görə inzibati xətanın bilavasitə obyekti olan xarici valyutanın dəyərinin 30-50%-dək məbləğdə cərimə edilir.
Qeyd edək ki, MMC 10 mart 2015-ci ildə qeydiyyata alınıb. Nizamnamə kapitalı 11.688. 495 AZN olan şirkətin hüquqi ünvanı Sumqayıt şəhəri, Sülh küçəsi, məhəllə 76-da yerləşir. MMC-nin qanuni təmsilçisi Zeynalova Rumidə Ağabəy qızıdır. Şirkətin təsisçilərindən biri fövqəladə hallar nazirinin müavini Orucəli Hacıyevin oğlu Elvin Hacıyevdir.
2015–ci ildə təməli qoyulmuş “Technoil” MMC – Azərbaycanda və Qafqaz regionunda yüksək keyfiyyətli mühərrik və sürtkü yağları istehsal edən ilk sənayə müəssisəsidir. “Technol” ticarət markası adı altında 2016–ci ildən etibarən Azərbaycan bazarında fəaliyyət göstərməkdədir. Bütün növ nəqliyyat vasitələri, minik və yük maşınları, motosikletlər, o cümlədən sərnişin və yükdaşıma gəmiləri üçün mühərrik yağları, ötürücü qutu yağları istehsalını həyata keçirən zavodumuz eyni zamanda sənayə məqsədli yağlar, reduktor yağları, hidravlik yağlar, müxtəlif növ sürtkü yağları və antifrizlər də istehsal edir.
