Vətən müharibəsi veteranı Araz Bayramov məşğulluqla bağlı çətinlik çəkir. Bu barədə 14 fevral tarixində Sumqayıt24 xəbər verir.
Sumqayıtlı qazi ötən ilin 8 fevral tarixində özünüməşğulluq proqramına qoşulub. Lazımi sənədləri təqdim edib, avtoyuma məntəqəsi açmaq və avadanlıqlar almaq üçün növbəyə yazılıb. Ona evində çəkiliş aparıldıqdan sonra dərslərə cəlb olunacağı, sonda isə avadanlıqların veriləcəyi vədi verilib.
“Sumqayıt Məşğulluq Mərkəzinin əməkdaşı sənədlərimi alaraq bildirdi ki, bir il müddətində rəsmi iş qeydiyyatım olmamalıdır. Olduğu halda növbə avtomatik ləğv olunacaq. Bir ildən çoxdur ki, işsizəm. Sumqayıt Məşğulluq Mərkəzinə dəfələrlə getmişəm. Çəkiliş komissiyasının gəlmədiyini, nə zəng, nə də ki dərslərlə bağlı heç bir xəbər olmadığını bildirmişəm. Qurumdan isə hər dəfə eyni cavab alıram - sənədlərin Bakıdadır, ora isə getməyin və müraciət etməyin bir mənası yoxdur.
Ətrafımda məndən aylar sonra proqrama qatılan şəxslər artıq bir-iki günə kursları bitirəcək və avadanlıqlarla təmin ediləcəklər”, - deyə Araz Bayramov bildirib.
