Sentyabrın 12-13-də geomaqnit qasırğası olacaq və radiosiqnalların ötürülməsində kəsilmələr gözlənilir.
Sumqayıt24 xəbər verir ki, Günəşdəki M sinif alışmalar səbəbindən Günəş aktivliyi yüksəlib. Sentyabrın 10-da Günəşin şimal-qərb hissəsində baş verən tac kütlə atılması sentyabrın 12-si günün ikinci yarısından 13-ü axşam saat 18:00 radələrinə qədər Yerdə geomaqnit qasırğası yaradacaq.
Hazırda geomaqnit sahə sakit və qeyri-stabildir. Sentyabrın 10-da baş verən tac kütlə atılmasının təsiri 12-13 sentyabr tarixlərində hiss ediləcək.
Sentyabrın 12-si gecə geomaqnit qasırğasının səviyyəsi G1 (mülayim), 13-ü səhər saat 08:00 radələrinə qədər G2 (orta), saat 20:00-dək isə yenidən G1 olacaq. Sonrakı müddətdə geomaqnit sahə sakit səviyyəyə qayıdacaq.
