Üzeyir Hacıbəylinin abidə kompleksi Sumqayıtda dahi bəstəkarın adını daşıyan küçədəki xiyabanda ucaldılıb.
Kompleksin açılışı 2010-cu ilin sentyabrın 15-də, bəstəkarın 125 illik yubileyi ərəfəsində baş tutub.
Sumqayıtın baş rəssamı Vaqif Nəzirovun müəllifi olduğu abidənin ümumi hündürlüyü 12 metr, postamentin oturacaq ölçüsü isə 7,5 x 7,5 metr təşkil edir. Postament royal formasında olub, qara qranitlə üzlənib, yüksələn hissəsi orqan borularının simvolik təsviri kimi verilib, üzərində 5 metr yüksəklikdə yerləşən bürüncdən hazırlanan barelyefin fonu isə ağ mərmərdən, üzük qaşı formasında işlənilib. Əks tərəfdən isə eyni fon üzərində milli musiqi alətlərimizin — tar, kaman və qavalın tökmə bürüncdən təsviri yerləşib.
Üzeyir Hacıbəyli 1885-ci ildə sentyabrın 18-də Şuşa şəhəri yaxınlığında Ağcabədi kəndində anadan olub. O, müasir Azərbaycan musiqi mədəniyyətinin qurucusu, Azərbaycan milli operasının, eləcə də Şərqdə ilk operanın banisidir.
Respublikamızda hər il Üzeyir bəyin anadan olduğu gün - 18 sentyabr “Musiqi Günü” kimi qeyd olunur.
