1994-cü il təvəllüdlü Nailə Quliyevanın (ad-soyad şərtidir) qətli ilə bağlı məhkəmə başa çatıb.
Sumqayıt24 xəbər verir ki, Sumqayıt Ağır Cinayətlər Məhkəməsinin hökmü ilə cinayətdə təqsirləndirilən 1961-ci il təvəllüdlü Sabir Məmmədov (ad-soyad şərtidir) 10 il müddətinə həbs olunub.
Cinayət şəxsi münasibətlər zəminində baş verib. Belə ki, 63 yaşlı Sabir Məmmədov Şamaxıda kolleclərdən birində şöbə müdiri olub. Qətlə yetirilən Nailə isə həmin təhsil ocağının tələbəsi olub.
Təqsirləndirilən şəxsin məhkəmədə ifadəsinə görə, onların arasında münasibət olub və Nailə Quliyeva bundan sui-istifadə edib. S. Məmmədovun iddiasına görə, qadın onu münasibətdə olarkən çəkdiyi foto ilə şantaj edib və bu, davamlı hal alıb. Təqsirləndirilən şəxs bildirib ki, o, bu şantaj nəticəsində hətta çalışdığı kollecdən də istefa verməyə məcbur qalıb.
Hadisə günü isə S. Məmmədov şəxsi avtomobili ilə Abşeron rayonu ərazisindən keçərkən Nailə onu öz maşını ilə təqib edib. Bu zaman qadın onun avtomobilinə arxadan öz maşını ilə bir neçə dəfə zərbə endirib. Bundan hiddətlənən şöbə müdiri avtomobili saxlayıb və Nailəni boğaraq öldürüb. Sonra polisə zəng edərək könüllü təslim olub.
S. Məmmədov Cinayət Məcəlləsinin 120.1-ci (qəsdən adam öldürmə) maddəsi ilə təqsirləndirilib.
