"Murov qartalı" ləqəbli kəşfiyyatçı, polkovnik-leytenant Raquf Orucov Aprel döyüşləri zamanı şəhid olub. 1990-cı ildə Sovet Qoşunlarında xidmət edən Raquf Orucov Qarabağ müharibəsi başlayanda Azərbaycan Ordusunun sıralarına qoşulub. Üç-dörd ay ərzində Fərrux dağı və Aranzəmin kəndində aparılan hərbi əməliyyatlar zamanı ayağından ağır qəlpə yarası alıb. Raquf Orucovun anası Raya Rəhimova 1993-cü il iyununun 12-də Ağdam rayonunun Cinli kəndinin işğalı zamanı şəhid olub. Elə həmin il Raquf sənədlərini Bakı Ali Hərbi Ümumqoşun Komandirləri Məktəbinə verib. Həmin məktəbi bitirdikdən sonra Bakıda yerləşən hərbi hissələrin birinə təyinat alıb, lakin gənc zabit ön cəbhədə olmağa üstünlük verib. 1996-cı ildə Murovdağa təyinat alaraq kəşfiyyat bölüyünün komandiri kimi fəaliyyətini davam etdirib. Murovdağda həyata keçirdiyi uğurlu kəşfiyyat əməliyyatlarına görə ona "Murov qartalı" ləqəbi verilib. 2016-cı il aprel ayının 4-də Ağdərə rayonunun Talış kəndinin erməni işğalçılarından azad edilməsi uğrunda Xüsusi Təyinatlı Qüvvələrin tərkibində polkovnik–leytenant Raquf Orucov sonuncu döyüşünə qatılıb və qəhrəmancasına şəhid olub.
"Murov qartalı" Sumqayıt Şəhidlər xiyabanında torpağa tapşırılıb.
