Novxanı qəsəbəsində yerləşən “My Beach” otelində “Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda obyekt mülki müdafiə məşqi keçirilib.
Sumqayıt24 xəbər verir ki, təlimdə Fövqəladə Hallar Nazirliyinin Sumqayıt Regional Mərkəzi və Sumqayıt şəhər Dövlət Yanğından Mühafizə İdarəsinin əməkdaşları, Qızıl Aypara Cəmiyyətinin Sumqayıt bölməsinin nümayəndələri, otelin rəhbər və işçi heyəti iştirak ediblər.
Məşq zamanı heyətin fövqəladə hal barədə xəbərdar edilməsi, toplanması, habelə yaranmış ekstremal vəziyyətin nəticələrinin aradan qaldırılması və ümumi idarəetmənin təşkili üzrə fəaliyyətləri qiymətləndirilib, həmçinin funksional vəzifələrlə bağlı məruzələr dinlənilib.
Sonda əldə edilmiş nəticələr müzakirə olunub, aidiyyəti üzrə tapşırıqlar verilib.
