Sumqayıtda axşam saatlarında taksi tapmaq müşkülə çevrilib.
Sumqayıt24-ə şikayətçilərdən daxil olan məlumata görə, “Bolt”, “Maxim”, əsasən də “Uber” şirkətinin taksi sürücüləri sifarişləri qəbul etmirlər. Sözügedən problemlə daha çox qəsəbələrdə, yaşayış massivlərində, eləcə də bağ sahələrində yaşayan sakinlər üzləşirlər:
“Sürücülər nağdsız ödəniş gördükdə sifarişdən imtina edirlər. Hər gün 30-40 dəqiqə taksi axtarırıq. Əsas yola çıxmaq üçün uzun məsafə qət etməli oluruq və getdiyimiz yerə gecikirik”, - deyə sakinlər qeyd ediblər.
Onların sözlərinə əsasən, taksi sürücüləri imtinaların əsas səbəblərindən biri kimi həm də yolların təmirsiz olmasını göstərirlər:
“Deyirlər ki, yollarınızda asfalt yoxdur. Ünvana çatana kimi avtomobillərimiz sıradan çıxır. Qazandığımızı da maşının təmirinə verməli oluruq”.
