Dünyanın ən nüfuzlu və reytinqli universitetlərində bugünə qədər bir çox azərbaycanlı tələbə təhsil alıb. Bu siyahıda dünyanın ən məşhur ali təhsil müəssisələri olan Oksford, Harvard, Kembric kimi universitetlər var.
Azərbaycanın belə istedadlı gənclərindən biri də dünyanın ən nüfuzlu universitetlərindən sayılan ABŞ-nin Massaçusets Texnologiya İnstitutuna (MIT) qəbul olan Sevinc Mahmudovadır.
Sumqayit24.az onunla müsahibəni təqdim edir:
- Öncə özünüz barədə ətraflı məlumat verərdiniz.
- Sevinc Mahmudova. 2006-cı ildə Sumqayıtda anadan olmuşam, özüm əslən Şəkidənəm. Türkiyə Dəyanət Vəqfi Bakı Türk liseyinin 2024-cü il məzunuyam. Bu yaxınlarda dünyanın ən nüfuzlu universitetlərindən olan Massaçusets Texnologiya İnstitutuna (MIT) qəbul olmuşam. Bu ilin sentyabr ayından həmin universitetdə təhsil almağa başlayacam.
- Universitet seçimi edərkən Massaçusets Texnologiya İnstitutunda təhsil almağa necə qərar verdiniz?
- Seçim etdiyim sahə üzrə ən reytinqli təhsil ocağıdır. Həm də univeristetin öz dəyərləri var. Müşahidə apardım və gördüm ki, mənim dəyərlərimlə üniveristetin dəyərləri üst-üstə düşür. Həmçinin, mənimlə birgə bu yola çıxan dostlarımın əksəriyyəti Massaçusets Texnologiya İnstitutuna qəbul olub. Mən də “niyə də yox” deyib müraciət edərək, qəbul aldım.
- Bəs, riyazi elmlərə marağınızı, bu uğura gedən yolu necə müəyyən etdiniz?
- İbtidai sinifdən Riyaziyyat fənninə marağım olub. 5-ci sinifdə oxuyanda Riyaziyyat müəllimim olimpiada anlayışı ilə bizi tanış etdi. Sinifdə riyazi elmə marağı olan şagirdləri seçib dərs keçirdi. Həmin vaxt Sumqayıtda təhsil alırdım. Sumqayıt regional üzrə olimpiadada 3-cü yeri tutdum. 6-cı sinifdə Dəyanət liseyinə qəbul oldum. Amma olimpiadaları da unutmadım. 11-ci sinifə qədər müxtəlif olimpiadalarda yerlər tutdum. Ən böyük uğurum isə Beynəlxalq Riyaziyyat Olimpiadasında qazandığım bürünc medaldır.
- Təhsil həyatında bu uğuru əldə etmək üçün necə çalışırdınız?
- Heç zaman daha çox oxumaqdan imtina etmədim. Zamanla çalışmağımın bəhrəsini də görürdüm, hansı ki mənə motivasiya verirdi.
Ümumiyyətlə, bu naliyyətlərim bir günün, bir ayın nəticəsi deyil. Neçə illərin, neçə adamların mənim üzərimdə birlikdə qoyduğu əziyyətlərin toplamıdır. Məncə, əsas məsələ gördüyümüz işi sevməkdir. Ətrafımda həmişə dərs oxumaqdan şikayət edən insanlar olurdu. Mən düşünürəm ki, şikayət etməkdənsə, dərs oxumağı sevdiyimiz bir şey halına gətirməklə davamlı edə bilərik.
- Dərslərinizi nə zamanlar oxuyurdunuz?
- Düzünü desəm, imkan tapdıqca. Elə bir dövrdə yaşayırıq ki, hər bir şagirdin təhsil həyatında bir nöqtədən sonra artıq nə qədər çalışmağından asılı olmayaraq hələ də oxumalı olduğu nəyisə qalır.
- Dünyanın ən nüfuzlu universitetlərindən olan Massaçusets Texnologiya İnstitutuna (MIT) qəbul olmaq necə hiss etdirir?
- Xəyalımdakı universitet idi. Keçən il müraciət edəndə Azərbaycandan 1 qəbul, 1 əlavə var idi və o mən idim. Şansımı bir daha yoxlamaq qərarına gəldim və indi əziyyətimin bəhrəsini gördüyüm üçün çox xoşbəxtəm.
- Massaçusets Texnologiya İnstitutunda (MIT) tələbələrdən tanıdığınız varmı?
- Hələ ki mənimlə eyni dövrdə qəbul olan digər şagirdləri yaxşı tanımıram. Ancaq hazırda MİT-də təhsil alan digər azərbaycanlıların çoxusunu ortaq olimpiada cəmiyyətində olduğumuz üçün hələ onlar qəbul olunmadan öncə də tanıyırdım, əlaqələrimiz yaxşıdır.
- Gələcəklə bağlı fikirlərin nələrdir?
- Daim inkişaf yönümlü işləməyin tərəfdarı olmuşam. Qarşımda hələ seçə biləcəyim çox ixtisas və bunun üçün də zamanım var. Lakin nə olursa olsun, bu gün məni mən edən dəyərləri qoruyub saxlamağı, gələcəkdə də Azərbaycana faydalı, vəfalı bir şəxsiyyət olmağa davam edəcəm.
Fidan İlqar
