"Sumqayıt" klubu heyətini legioner futbolçu ilə gücləndirməyə yaxındır.
İdman.biz-in məlumatına görə, komanda Ukraynanın "Polesye" klubunun mərkəz müdafiəçisi Danilo Beskorovaynla bağlı transfer prosesini yekunlaşdırmaq üzrədir.
"Sumqayıt" klubunun mətbuat katibi Zaur Xudiyev futbolçu ilə maraqlandıqlarını İdman.biz-ə təsdiqləyib:
"Keçid hələlik rəsmiləşdirilməyib, lakin yaxın vaxtlarda bu prosesin tamamlanması gözlənilir. Böyük ehtimalla Beskorovayn "Sumqayıt"a icarə əsasında qoşulacaq, müqavilənin müddəti və digər detallar isə yaxın günlərdə açıqlanacaq".
Qeyd edək ki, ukraynalı baş məşqçi Yuri Vernidubun "Neftçi"yə keçidindən sonra sözügedən oyunçunun "ağ-qaralar"a transferi gündəmə gəlsə də, keçid alınmayıb. Əldə olunan məlumata görə, buna səbəb "Polesye"nin müdafiəçini yalnız icarə əsasında buraxmağa razı olması, "Neftçi"nin isə birdəfəlik transfer etmək istəməsidir. Ukrayna klubu ağır zədədən sonra oyun praktikasından əziyyət çəkən Danilonun təcrübə qazanması üçün "Sumqayıt"a keçidinə mane olmayıb.
