Novxanı qəsəbəsində məşhur bağ evi satılır. Sumqayıt24 bu haqda 13 fevral tarixində xəbər verir.
Villa dənizin sahilində yerləşir, 45 sotun içərisindədir və sahəsi 1500 kv.m-dır. Birinci mərtəbədə idman zalı, bilyard masası, tennis, qəlyan masası, içki barı, sauna, sanitar qovşaq var. İkinci mərtəbədə geniş zal, mətbəx, yataq otağı və sanitar qovşaq mövcuddur. Üçüncü mərtəbədə 4 yataq otağı, həmısında cakuzi, hamam, tualet və dənizə açılan geniş bir balkon var. Dördüncü mərtəbə isə 1 yataq otağı, iki nəfərlik cakuzi, kral taxtı, bütün avadanlıqlarla təchiz olunmuş 40 nəfərlik disko klub və geniş dəniz panoramalı balkondan ibarətdir.
Mərtəbələrarası şüşə lift quraşdırılıb. Villada sənədli və sertifikatlı, dünya şöhrətli sənətkarların rəsmləri və heykəltaraşların əsərləri var. Həyətdə hovuzu və 50 nəfərlik banket zalı, 200 min dollar dəyərində heykəltaraşlıq nümunəsi olan şəlalə də mövcuddur. 150-dən çox təbii və dekorativ ağac olan bağ evinin həyətində yaxta, kater və maşınların saxlanılması üçün qaraj və avtoyuma da qurulub.
Qeyd edək ki, villaya 6.5 milyon manat qiymət qoyulub. Onun Rusiyada çalışan iş adamı "Bəxtiyar Dali"yə məxsus olduğu bildirilir. [modula id="31746"]
