Novxanıda yerləşən "New Life" reabilitasiya mərkəzində xəstələrə əzab verən əməkdaşlar kassasiya şikayəti veriblər.
Pravda.az-ın məlumatına görə, şikayət Ali Məhkəmənin hakimi Nazim Mövsümovun sədrliyi ilə araşdırılacaq. İlkin hazırlıq iclası oktyabrın 21-nə təyin edilib.
Xatırladaq ki, Bakı Ağır Cinayətlər Məhkəməsinin hökmü ilə Famil Rzayev 8 il, Orucəli Əliheydərov və Elvüsal Hüseynov 7 il, Qənbər Həsənov 6 il 6 ay, Sərxan Əliyev isə 6 il müddətinə azadlıqdan məhrum ediliblər.
Bundan başqa, dəymiş ziyana görə O.Əliheydərovun şəxsi avtomobili, E.Hüseynovun isə yaşadığı evin ona düşən hissəsi müsadirə olunub.
Qeyd edək ki, "New Life" Novxanı qəsəbəsində fəaliyyət göstərib. Mərkəzdə dünyada narkotik, alkoqol və digər asılılıqların müalicəsində tətbiq olunan "12 addım" proqramından istifadə olunub. Mərkəzin rəhbəri O.Əliheydərov, digər əməkdaşları - E.Hüseynov, F.Rzayev, S.Əliyev və Q.Həsənov pasiyentlərə işgəncə verməkdə, onları qanunsuz azadlıqdan məhrum etməkdə ittiham olunurlar. İddia edilir ki, işgəncə nəticəsində Hüseyn Məmmədov adlı pasiyent ölüb.
Zərərçəkmişlərə münasibətdə suda boğma, yüksəklikdən asma, bağlı qapı arxasında saxlama kimi işgəncə növlərindən istifadə edilib. Dəstə üzvləri Cinayət Məcəlləsinin 133 (əzab vermə), 145.3 (qanunsuz azadlıqdan məhrumetmə) maddələri ilə təqsirləndirilirlər.
E.Hüseynov, O.Əliheydərov və F.Rzayevə, həmçinin Cinayət Məcəlləsinin 192-ci (qanunsuz sahibkarlıq) maddəsi ilə də ittiham verilib.
