Azərbaycanda onurğa əyriliyi olan şəxslərin hərbi xidmətə yararlı olub-olmaması müzakirə olunan mövzulardan biridir.
Modern.az-ın məlumatına görə, Səfərbərlik və Hərbi Xidmətə Çağırış üzrə Dövlət Xidmətindən bildirilib ki, skolioz və kifozların mərhələsi rentgenoqramlar üzrə V.D. Çaklinin müəyyən etdiyi Kobb bucaqlarının hesablanması əsasında təyin edilir.
"1-ci dərəcəli skoliozlar (Kobb bucağı 10°-yə qədər), 1-ci və 2-ci dərəcəli kifoz (Kobb bucağı 50°-yə qədər) müəyyən olunmuş vətəndaşlar hərbi xidmətə çağırılan və ya hərbi xidmətə könüllü daxil olan zaman hərbi xidmət keçməyə yararlı hesab olunurlar.
Qeyd edək ki, başın yuxarı dartılması zamanı və ya uzanmış vəziyyətdə düzələn, önə əyilmə zamanı təsbit olunmuş rotasiya aşkar edilməyən onurğanın yana (əksər hallarda sola) sadə (qeyri-struktur) əyriliyi olan qamət skoliozu (uzanmış vəziyyətdə ön-arxa istiqamətdə çəkilmiş onurğanın rentgenoqramında əyriliyin düzəlməsi) həqiqi struktur skoliozu kimi qiymətləndirilmir və hərbi xidmətə yararlı hesab olunur", - qurumdan bildirilib.
