Dünən Sumqayıtda baş verən partlayışdan sonra bina sakinləri küçələrdə qaldıqlarını iddia edirlər.
Adının açıqlanmasını istəməyən bina sakini deyir ki, hadisə həqiqətən dəhşətli idi:
“Sakinlər hələ də sığınacaqlara yerləşdirilməyiblər, dünən bütün günü hamımız yağışın altında çöldə olmuşuq. Bizə burada heç su da gətirib verilməyib. Sakinlər öz xərcləri ilə “xeyir- şər” evində toplaşıb çay hazırlayıblar. Kimin Sumqayıtda qohumu varsa, dünən gecəni orada qalıb. Lakin qohum evində nə qədər qalmaq olar, məcburuq bu gün özümüzə qalmağa yer tapaq”, - deyə bina sakini əlavə edib.
Əməkdaşımız ərazidə olarkən sakinlərlə söhbət əsnasında öyrənib ki, binanın digər bloklarının sakinləri növbə ilə bu gün evlərinə buraxılıblar ki, zəruri geyim və əşyalarını götürsünlər. Lakin onlara evlərində gecələməyə icazə verilməyib.
Dünəndən küçələrdə qalan sakinlərin iddiasına görə, onlarla heç bir dövlət qurumu maraqlanmır.
