Sumqayıt şəhəri, 13-cü mikrorayon ərazisində partlayış baş verən binada bərkitmə işləri aparılır.
Sumqayıt şəhər İcra Hakimiyyətinin mətbuat katibi Eyvaz Qocayev bildirib ki, təhlükəsizlik tədbirləri tam şəkildə həyata keçirildikdən sonra digər iki blokun sakinlərinin mənzillərdə məskunlaşması məsələsinə baxılacaq:
"Qəza baş verən girişlə bağlı isə aidiyyəti qurumların mütəxəssislərinin araşdırmaları nəticəsində yekun qərar qəbul ediləcək”.
Qeyd edək ki, bina 6 girişdən ibarətdir. 3 girişdə sakinlərin məskunlaşması artıq təmin olunub.
Xatırladaq ki, 3 dekabr tarixində 19 saylı binada partlayış baş verib. Nəticədə 6 nəfər xəsarət alıb. Onlardan üçü ambulator müayinə üçün evə buraxılsa da, digər 1 nəfər vəfat edib, 2 nəfərin isə müalicəsi davam etdirilir.
