Sumqayıt şəhəri, 13-cü mikrorayon ərazisində yerləşən mənzildə və Novxanı qəsəbəsindəki fərdi yaşayış evində baş verən partlayış zamanı əmlaklara ciddi ziyan dəyib.
Azərbaycan Sığortaçılar Assosiasiyasından Trend.az-ə bildiriblər ki, müvafiq partlayış hadisələri sığorta hadisəsi hesab edilir:
"Müvafiq əmlakların sığortası varsa, həmin əmlakların sahibləri sığortalandıqları sığorta şirkətlərinə müraciət edə bilərlər. Nəticədə müvafiq hadisə sığorta hadisəsi kimi tanındıqdan sonra ödəniş əldə edə bilərlər.
Qeyd edək ki, Daşınmaz əmlakın icbari sığortası respublika ərazisində məcburidir və bu sığorta növü üzrə proseslər 2011-ci ildə qəbul edilmiş “İcbari sığortalar haqqında” Azərbaycan Respublikasının Qanunu ilə tənzimlənir.
Müvafiq qanunvericiliyə əsasən Sumqayıtda yerləşən yaşayış əmlakları üzrə sığorta haqqı 40 manat, sığorta təminatı 20 min manata qədər təşkil edir.
Azərbaycan Sığortaçılar Assosiasiyası olaraq vətəndaşlarımıza bildirmək istəyirik ki, bu kimi hadisələr gözlənilməzdir və qaçılmazdır. Məhz buna görə də bütün daşınmaz əmlak sahiblərini vaxtında sığortalanmağa çağırırıq”.
