Sumqayıtda partlayışda xəsarət alanların son durumu açıqlanıb.
TƏBİB-dən Sumqayit24.az-a bildirilib ki, 13-cü mikrorayondakı mənzildə baş verən partlayış zamanı yaralanan 47 yaşlı Ramin Əliyev və oğlu, 17 yaşlı Ayxan dekabrın 4-də axşam Bakıda fəaliyyət göstərən özəl tibb müəssisəsindən Sumqayıt Tibb Mərkəzinin 2 nömrəli Xəstəxanasına təxliyə olunublar.
“Başın, boyunun, gövdənin hər iki yuxarı və aşağı ətrafın I-II-III A dərəcəli termiki yanığı (70-75%), döş qəfəsinin sağ yarısının küt travması, sağtərəfli pnevmatoraks, yanıq şoku III dərəcə diaqnozları təyin edilən 1977-ci il təvəllüdlü şəxs və başın, boyunun, gövdənin hər iki yuxarı və aşağı ətrafın I-II-III A dərəcəli termiki yanığı (60-65%), yanıq şoku III dərəcə diaqnozları təyin edilən 2007-ci il təvəllüdlü şəxs xəstəxananın Reanimasiya şöbəsinə yerləşdirilib.
Ağırlıq dərəcəsinə əsasən xəstələr xüsusi boksdadır. Tibbi personal tərəfindən bütün zəruri tibbi yardımlar göstərilir, vəziyyətləri ağır olaraq qalır”, - deyə qeyd olunub.
