“Sumqayıt şəhəri, 13-cü mikrorayon ərazisində mənzildə partlayış baş verməsi səbəbilə xəsarət alan 5 nəfərdən 1 nəfərin müalicəsi davam etdirilir, 2 nəfər isə ambulator müalicə üçün evə buraxılıb”
Sumqayit24.az-a bu barədə TƏBİB-dən məlumat verilib. Bildirilib ki, Nərimanov Tibb Mərkəzinin nəzdindəki Yanıq Mərkəzinə təxliyə olunanlardan 1977-ci il təvəllüdlü (kişi cinsli) şəxsə baş, boyun, hər iki yuxarı aşağı ətraflar, gövdənin ön, yan və arxa səthlərinin termiki yanığı, 2007-ci il təvəllüdlü (qadın cinsli) şəxsə üz və hər iki yuxarı ətraflar, aşağı ətrafların hissəvi yanığı, 2010-cu il təvəllüdlü (kişi cinsli) şəxsə isə hər iki yuxarı və aşağı ətraflar, gövdənin ön və arxa səthi, baş və boynun total yanığı diaqnozları təyin olunub.
Xəsarət alan şəxslərdən 2007-ci il təvəllüdlü (qadın cinsli) və 1977-ci il təvəllüdlü (kişi cinsli) şəxslər paytaxtdakı özəl tibb müəssisələrindən birinə təxliyə olunub.
Hazırda 2010-cu il təvəllüdlü (kişi cinsli) şəxsin müalicəsi Yanıq Mərkəzində davam etdirilir, vəziyyəti isə kritik ağır olaraq qiymətləndirilir.
Sumqayıt Tibb Mərkəzinin nəzdindəki Təcili Tibbi Yardım Xəstəxanasına hospitalizasiya olunan 1952-ci il təvəllüdlü (kişi cinsli) şəxsə arterial hipertenziya, Uşaq Xəstəxanasına hospitalizasiya olunan 2008-ci il təvəllüdlü (kişi cinsli) şəxsə isə diz oynağının açıq yarası diaqnozu ilə zəruri tibbi yardımlar göstərilib. Onların hər ikisi ambulator müalicə üçün evə buraxılıb.
