Sumqayıtda yol-nəqliyyat hadisəsi törətməkdə təqsirləndirilən Elvin Ağazadəyə hökm oxunub.
“Pravda.az”ın məlumatına görə, proses Sumqayıt Şəhər Məhkəməsində hakim Samir İsmayılovun sədrliyi ilə keçirilib. Məhkəmənin hökmü ilə E. Ağazadə cəzasını məntəqə tipli cəzaçəkmə müəssisəsində çəkməklə 2 il 6 ay müddətinə azadlıqdan məhrum edilib.
İttihama görə, hadisə ötən ilin dekabr ayında Koroğlu küçəsində qeydə alınıb. 24 yaşlı Elvin Ağazadə etibarnamə əsasında idarə etdiyi və anasına məxsus olan "Kia" markalı avtomobillə hərəkətdə olarkən piyada, 71 yaşlı Hacıalı Hacıyevi vurub. Yaralı 4 gün sonra xəstəxanada həyatını itirib.
Məhkəmədə Elvin Ağazadə elan olunmuş ittihamla özünü təqsirli bilərək ifadəsində deyib ki, Azərbaycan Texniki Universitetində nəqliyyat mühəndisliyi və logistika ixtisası üzrə ali təhsil alır.
Məhkəmə iclasında zərərçəkmiş şəxsin hüquqi varisi qismində ifadə verən mərhumun övladı bildirib ki, Ekologiya və Təbii Sərvətlər Nazirliyinin qurumlarının birində direktor vəzifəsində çalışır. O, məhkəməyə ərizə təqdim edərək təqsirləndirilən şəxs ilə barışdığını, onlara dəymiş maddi və mənəvi zərərin tam ödənildiyini, bu səbəbdən də Elvin Ağazadəyə qarşı heç bir şikayətin və tələbinin olmadığını qeyd edib.
